Termennet eo kefridioù ur Park natur rannvroel gant Kod an endro. Diwar e gefridioù e sav, asambles gant e gevelerien ur steuñvenn diazezet war an diorren padus war e diriad a-bezh : ar garta an hini eo. Ur wech savet ar garta e termenno ha hencho labour ar Park.
Kefridioù ar park
Ur Park natur rannvroel a zo dezhañ pemp kefridi hervez mellad R333-4 Kod an Endro :
- Gwareziñ ha merañ ar gladoù naturel, sevenadurel ha dremmvroel,
- Terkañ an tiriad
- An diorren ekonomikel ha sokial
- An degemer, an deskadurezh hag ar c’helaouiñ
- An arnodiñ hag an neveziñ
Ar garta
Ar garta a zo ur gevrat enni ar steuñvenn a zispleg penaos e vo gwarezet ha peseurt palioù diorren padus a zo evit Park natur rannvroel Arvorig. Ur wech skrivet e vez kinniget d’un enklask foran evit ma c’hellfe an holl burutellat ha da c’houde e rank ar c’humunioù ‘barzh ar Park votiñ evit reiñ o asant koulz hag ar rannvro, an departamant hag ar gevelerien sokiomicherel ha prezidanted ar c’hevredigezhioù.
Termenniñ a ra ar palioù da dizhout, war peseurt tu heñchañ ar gwareziñ, ar brudañ hag an diorren er Park koulz hag ar muzulioù evit kas ar palioù da benn. A-benn 15 vloaz e vez azgwelet ar garta hag hervez mont-en-dro an difrae-mañ e vo adrummet ar Park pe get gant ministrerezh an endro. Park natur rannvroel Arvorig en doa dibabet an dremmvroioù da ziazez ar garta 2009-2024 gant an titl “Evit dremmvroioù dibabet en Arvorig”.
Palioù labour ar garta-mañ a zo :
- Kreñvaat pinvidigezh elfennoù ar glad a ziorren kalite buhez d’an dud.
- Skoulmañ asambles labour an dud ha talvudegezh ar gladoù naturel war an douar, war vor, war an inizi.
- Buheziñ ar gladoù hag ar c’hrouiñ arzel gant raktresoù boutin
- Labourat amañ (er c’humunioù) hag ahont (broioù all)
Ar preder evit sevel karta da zont Park natur rannvroel Arvorig a zo bet boulc’het.
Gwelloc’h kentrec’hiñ eget rediañ
Barregezh ar Park evit gwareziñ ha diorren e diriad a zo diazezet war mont-en-dro ar garta ‘benn tizhout ar palioù, o c’houzout e vez graet al labour-se dre titouriñ, kelaouiñ, buheziñ ha degas deskadurezh d’an dud a zo o chom, o tremen pe o labourat er park.