Uheloc’h eo douar Eusa eget hini Molenez a zo en he c’hichen. Ar ger Eusa a deu deus ar galianeg hag e talveze « an hini uhelañ ». Enezenn vrasañ Penn-ar-Bed eo gant he ment a dap 4 km war 8 km. An hini bobletañ eo ivez (1000 annezad warni). Morreden ar Froñveur, yen ha kreñv, a ra an disparti etre Eusa hag enezeier Molenez. Tourioù-tan Ar Gazeg ha Kereon ‘zo bet savet evit heñchañ ar bigi ‘maez deus ar Froñveur.
Ur vro c’harv ha meurdezus eo Eusa. Rediet eo ar plant da greskiñ a-rez an douar gant an avelioù, koulskoude eo klouar an hin, soubl alies ha stabil tro ar bloaz. Ul lec’h dudius eo evit ar valeerien koulz hag an dud a glask aveliñ o fenn en ul lec’h diguñvezh ha tud a blij dezho arsellet ouzh al laboused. Eusa a zegemer al laboused mor hag al laboused divroidi a gav repu enni en diskar amzer. An tamm douar-mañ, a zo an hini diwezhañ, tud o vevañ ennañ e kornog pennvro Frañs, a ya da sevel asambles gant Molenez ha Sun Mirva Biosferenn an Hirwazh, ur rouedad mirvaoù dindan ul label roet gant an UNESCO.
E douaroù Eusa, tournaodoù uhel an arvor a zo roget-diroget padal an douaroù e reter an enezenn, goudoretoc’h, a zo enno lannegoù a gemm o livioù hervez mare ar bloaz.
Ar vag a ra ar monedoneoù bemdez a ya kuit diouzh Brest ha diouzh Konk-Leon. E miz Gouere hag Eost, ur vag vulzun a loc’h diouzh Kameled (Gourenez Kraozon). Tu a zo ivez kemer un nijerez a nij kuit diouzh aerborzh Gwipavaz evit douarañ war aerborzh Eusa.
An ekomirdi, ur prenestr war an istor
Daou dour-tan a zo bet savet war an enezenn Tour-tan ar Stif hag hini ar C’hreac’h a zo ennañ Mirdi an Tourioù-tan hag ar balizennoù. Ar mirdi a zispleg deomp istor ar sinalioù war vor. E kêriadenn an Nioù, eo bet savet ‘barzn unan deus an tiez kozh, gant Park natur rannvroel Arvorig, ekomirdi kentañ er Frañs. Drezhañ, e c’heller kompren buhez bemdez an eneziz gwechall ha kaout ur sell war istor difer an enezenn.